بىراق ءبىزدىڭ زامانىمىزدا سيرەك بولسا دا 14-15-كە دەيىن بالا تاۋىپ, ءبارىن ءوسىرىپ-ءوندىرىپ وتىرعان جاندار تابىلادى. ءار ايماقتا, ءار وڭىردە وسىنشاما ۇل-قىزدى ۇياسىنا دا قوندىرىپ, قياسىنا دا جەتەلەپ, ارقايسىسىنىڭ قيىندىعى مەن قىزىعىنا كەزەك كونگەن ءورىستى اتا-انالاردى نەگە بولە-جارىپ دارىپتەمەيمىز؟
بۇلاردىڭ بەينەتى كەشەگى ەكىنشى دۇنيەجۇزىلىك سوعىستا ەكى دۇركىن كەڭەس وداعىنىڭ باتىرى بولعانداردان ءبىر مىسقال دا كەم ەمەس, ارتىق بولماسا. بۇلار – ەكى دۇركىن باتىر انالار!
ءسوزىمىز قۇرعاق بولماسىن, وسى زاماندا ەكى دۇركىن باتىر انالار بار ما ءوزى دەپ, الەۋمەتتىك جەلىلەردەن سۇراتۋ سالعىزعانىمىزدا, بار بولىپ شىقتى.
ء«بىزدىڭ اقتوبە وبلىسى ىرعىز اۋدانىندا 16 بالا تۋعان اسىل دەگەن اپامىز بار. مەنىڭ قۇداشام 16-شى بالاسىنا تۇرمىسقا شىقتى. سول كىسىنىڭ بالالارىنىڭ بارلىعى ەڭگەزەردەي. ەڭ ۇلكەنى «الپامىس مەكتەپكە بارادى» كينوسىنداعى مۇنار اتا سياقتى. تاۋ عوي, تاۋ. قىزدارى دا سونداي. اسىل اجە قازىر نەمەرەلەرىن باعىپ وتىر. 16 بالاسى, بۇكىل قۇدا-جەكجاتتارى جينالعاندا ءبۇتىن ءبىر اۋىلداي بولادى عوي. التىن قۇرساقتى اپامىزدان اينالىپ وتىرامىن ىلعي», دەيدى باقىت جانشاەۆا.
ء«بىزدىڭ ماڭعىستاۋدا 15-17 بالا تاۋىپ, تəربيەلەگەن بىرنەشە انا بار», دەپ جازادى بايىرعى ەگەمەندىك ارىپتەسىمىز ماڭدايلى قوسىمباي.
«شەشەمنىڭ قاماش سەيىتجانوۆا دەگەن اپاسى الماتىدا تۇرادى. 20 بالانى ومىرگە اكەلگەن. قازىر 78 جاسقا كەلدى. بالالارىنىڭ ءبارى امان. قاماش اپامىز نەمەرە-شوبەرە ءسۇيىپ وتىرعان باقىتتى اجە», دەپتى ازامات ەسەنجول اتتى زامانداس. سول سياقتى جانسايا نۇرتازينوۆا ءبىر قۇرداسى 17 بالانىڭ ءبىرى ەكەندىگىن ايتىپ, ءسۇيىنشى سۇرايدى.
ال ايتكۇل شالعىنباەۆا 18 بالا تاپقان انا بار ەكەندىگىن ايتادى, ول كىسىنىڭ وتباسىنا كەزىندە «گازەل» كولىگى بەرىلدى. ەندى بالالارى ازامات بولىپ كەتكەن بولار دەسە, ونىڭ ءسوزىن ەرلان ورىستەمبەكوۆ تە قولداپ, ء«يا, ول كىسى بار. 18 بالاسى دا ەرجەتتى. نەگىزى 21 بالا تاپقان. ءبىزدىڭ اۋىلدا تۇرادى. بۇلار كارشىعاەۆتار وتباسى. بالالارى ءۇيلى-باراندى بولىپ وتىر. قازىر سول «گازەلىمەن» جالاعاش پەن اۋىل ورتاسىندا قاتىناپ ءجۇر», دەپ قۋاتتايدى. سول سياقتى قانشاگۇل مۇستافاەۆا وسى اقپاراتتى راستاپ, «بۇلار قارشىعاەۆتار وتباسى, جارى فاتيما اپا. نەگىزى قالانىڭ تۇرعىندارى. تىركەۋدە قىزىلوردا قالاسىندا. ال وزدەرى جالاعاشتىڭ ەڭبەك اۋىلىندا تۇرادى. ءبىر بالاسى وسىدان 3-4 جىل شاماسىندا قايتىس بولدى. باسقا بالالارى بالالى-شاعالى بولدى», دەپتى.
ەندى شىمكەنت قالاسىنان قارلىعاش ەگەنوۆا تۋىسقان اپاسى انار باتىروۆا 15 بالا تاۋىپ, ونىڭ 14-ءى امان-ەسەن جەتىلگەنىن باياندايدى. قازىر كۇيەۋىنىڭ تەگىنە جازىلىپ, جاپاباەۆا بولىپ ءجۇر دەپتى.
قالامى قارىمدى ارىپتەستىڭ ءبىرى تولقىن سادىروۆا 20 بالا كوتەرگەن انادان سۇحبات العانىن جازادى. ءبىر-ەكەۋى شەتىنەپ كەتكەن, ەكەۋىن ەنەسى تۋىستارىنىڭ باۋىرىنا سالعانىن, قالعان 16 بالانى ءوزى قاتارعا قوسقانىن ايتادى.
ال جۋرناليست ايشا تۇرماعانبەتوۆا 18 بالا تۋعان قاناي قۇدايبەرگەن دەگەن قايىن اپاسى تەمىرتاۋ قالاسىنىڭ قاسىنداعى اقتاۋ كەنتىندە تۇراتىنىن حابارلايدى.
بۇل از بولسا, جەتكەر ءجۇسىپ قىزىلوردا وبلىسىنىڭ تەرەڭوزەك اۋدانىندا 23 بالا تاپقان انا بار, ۇمىتپاسام ول كىسى 4 رەت ەگىز تاپقان دەپتى.
ەندى قاراپ وتىرساق, كوپ بالالى انالاردى «التىن القا» جانە «كۇمىس القالارمەن» ماراپاتتاۋ تۋرالى ەل پرەزيدەنتىنىڭ 2016 جىلعى 21 شىلدەدەگى №303 جارلىعىنا سايكەس انالارعا التىن جانە كۇمىس القالارىمەن قاتار, وردەن كىتاپشالارى بەرىلەتىنى بەلگىلى جانە كوپ بالالى انالارعا, القا يەگەرلەرىنە 6 اەك, ياعني 12 685 تەڭگە كولەمىندە ارنايى مەملەكەتتىك جاردەماقى بەرىلەدى. سونىمەن قوسا, بۇل ساناتتاعى ازاماتتارعا سالىق كودەكسىنە سايكەس, سالىق تولەمدەرى بويىنشا جەڭىلدىكتەر قاراستىرىلعان.
الايدا 7 بالا تۋعان جانە 17 بالا وسىرگەن التىن قۇرساقتى انالاردىڭ قۇقىعى بىردەي, بىراق بەينەتى ەكى ەسە.
ەندەشە ەكى دۇركىن كەڭەس وداعىنىڭ باتىرلارى كەتكەن زاماننىڭ ۇلەسىندە قالسىن دەپ تىلەيىك. بىراق ەكى دۇركىن باتىر انالاردى نەگە ەرەكشە قامقورلىققا الماسقا؟! نەگە مەملەكەت تاراپىنان ەكى ەسە جاقسىلىق جاساماسقا! ولار ىلۋدە بىرەۋ!
ايناش ەسالي,
«ەگەمەن قازاقستان»
